Wulfstan: The Apostles’ Creed

[1] Wē gelȳfað on ǣnne God ælmihtigne þe ealle þing gesceōp and geworhte.

[2] And wē gelȳfað and georne witon þæt Crist Godes sunu tō mannum cōm for ealles mancynnes ðearfe.

[3] And wē gelȳfað þæt hine clǣne mǣden gebǣre, Sancta Maria, þe nǣfre nāhte weres gemānan.

[4] And wē gelȳfað þæt hē miċel geðolode and stīðlīce þrōwode for ūre ealra nēode.

[5] And wē gelȳfað þæt hine man on rōde āhēnge and hine tō dēaðe ācwealde and hine siððan on eorðan bebyrigde.

[6] And wē gelȳfað þæt hē tō helle fērde and ðǣrof gehergode eal þæt hē wolde.

[7] And wē gelȳfað þæt hē siððan of dēaðe ārise.

[8] And wē gelȳfað þæt hē æfter þām tō heofonum āstige.

[9] And wē gelȳfað and georne witon þæt hē on dōmes dæg tō ðām miclan dōme cymð.

[10] And wē gelȳfað þæt ealle dēade men sculon þonne ārīsan of dēaðe and þone miclan dōm ealle gesēcan.

[11] And wē gelȳfað þæt ðā synfullan sculon þanon on ān tō helle faran and ðǣr ā siððan mid dēoflum wunian on byrnendum fȳre and on ēcan forwyrde, and ðæs ǣnig ende ne cymð ǣfre tō worulde.

[12] And wē gelȳfað þæt ðā gōdan and wel Cristenan þe hēr on worulde Gode wel gecwēmdon þonne on ān sculon intō heofonum faran and ðǣr siððan wununge habban mid Gode selfum and mid his englum ā on ēcnesse. Amen.