A Miracle of St Benedict

[1] Ēac hit ġelamp sume dæġe þæt þā ġebrōðru timbredon þæs mynstres hūs. [2] And þā læġ þǣr ān stān tōmiddes, þone hīe mynton hebban ūp on þæs hūses timbrunge, ac hine ne mihton twēġen men ne þrīe onstyrian. [3] Þā ēodon þǣr mā manna tō, ac hē swā þēah wunode fæst and unwendedliċ, efne swelċe hē wǣre hæfd be wyrtwalan in þǣre eorðan. [4] And ēac hit openlīċe mihte bēon onġieten þæt se ealda fēond sæt ofer þām stāne, þone ne mihton swā maniġra wera handa onstyrian. [5] Þā for þǣre earfoþnesse wæs sended tō þām Godes were, and þā brōðru bǣdon þæt hē cōme and mid his gebedum þone fēond onweġ ādrife, þæt hīe mihten þone stān ūp āhebban. [6] Þā sōna swā se Godes wer þider cōm, hē dyde þǣr his ġebed and his bletsunge. [7] And þā wearð se stān mid swā miċelre hrædnesse ūp āhafen, swelċe hē ǣr nǣniġe hefiġnesse on him næfde.